|
上海闲话从8个声调个老上海话发展成为5个声调个新上海话，伊变化顶快个辰光是20世纪10年代到30年代，搿段辰光正好是上海经济文化发展顶快个时代。上海闲话是哪能变化又是哪能持续传承下来个呢？搿搭来回答几个常常有人提出个问题。 第一个问题：新上海话是勿是苏州、宁波等方言拼合起来出来个混合新方言？ 语言个构成告伊个变化自有伊个严格个规律个，一种语言个声母韵母声调组合形成严密个结构，勿会得由几种语言拼合。移民籍贯混杂，但大城市个通行语言结构勿可能混杂。上海个移民多数是渐渐从各地进入上海个，移民共同认同个是搿个发达都市个上海话告当时个国语。所谓混合语，是指一个语言中个词汇杂乱，搭两个或两个以上个语言音系相联系，新个上海话勿是搿能个。勿同个方言，每个词语个声调首先勿一样，侬倒讲讲看，句子哪能拼读出来？新上海话里吸收最多个是英语音译词，连搿点音译词都侪是用上海话个连读调读个，所以只是上海话中个“借词”。语言流传个稳定延续特征，决定了大都市里勿可能抛弃自家个权威方言而去拼合新造一个语言出来。所以新上海话并勿是诸如苏州话、宁波话等江浙方言个混合语，以松江话为基础个老上海话基本词汇多数传承辣新上海话里向，据统计，1869年英国传教士艾约瑟出版个《上海方言词汇集》里记录个词语搭仔20世纪末期个上海话相比较，传下来完全勿变个词语有73.5%，淘汰个占12.9%；1894年法国传教士RABOUIN辣土山湾编撰个《法华上海方言松江方言词典》当中，至今保留呒没变个词语占74.1%，淘汰个占17.7%。搿个事实说明老上海话个用词大约四分之三还保留辣新上海话当中。搿搭要提起注意个有两点：一点是北部吴语区个方言个高度一致，本来就有一大批共同个词语，像“促掐、殟塞”等；还有一点是，假使倒过来从现今个上海话词典浪个词语对照当年来统计，就绝对勿是搿个比率了。搿个说明，上海开埠以后，移民告本地人主要是一道辣上海个物质、精神现代化当中创造了大量新词语，翻新了上海话。 世界上开放性个大都市几乎侪是辣本土语言基础浪大量吸收国内外各民族、各方言中个好词语，成为语言文化个集散地。伦敦英语吸收个方言、外来语比上海话多得多，因此集中了人类过去个告最新个优秀词语，总数大大超过其他语言。 第二个问题：外地、外籍人士大量来到上海，是勿是会造成上海话衰弱？ 并勿是外地人个比例增加，本地方言必然会削弱。只要是辣各种语言顺其自然个多元环境下，上海话个语言历史证明了，辣20世纪二三十年代，外地、外国人来得最多个辰光，恰恰是上海话发展得最强盛最活跃个时期。语言搭人类社会一样，是会产生杂交优势告扩散效应个。 第三个问题：新老上海人是哪能来传承上海话个？ 移民来到上海，第一代个多数人是保持讲家乡方言个，有点人工作需要咾学上海话，因为超过了学语言12岁前个好时机，往往学成个洋泾浜，所以上海弄堂里可以听到“南腔北调”。但是从伊拉个小囡即第二代起，就辣辣幼儿园小学里，跟了上海小囡，邪气快个就学好了一口标准个上海话，因为小囡侪辣辣天生个学语言最佳时期，学起来是老快老准个，新上海人个子女也就变成了讲上海话个上海人，不过有交关人回到屋里告爷娘讲家乡话也讲得老好个。搿能介从小会多语个小囡，勿但勿会发生语言干扰，而且转换很快很准，科学证明对大脑发育交关有好处。 (责任编辑：admin) |